Cette page n’a pas encore été corrigée
Od sei primes cunseil en prent
Qu’a un Deu serf confés se rent :
Barinz out nun cil ermite,
Murs out bons e sainte vitte ;
Li fedeilz Deu en bois estout,
Tres cenz moines od lui i out ;
De lui prendrat conseil e los,
De lui voldrat aveir ados.
Cil li mustrat par plusurs diz,
Beals ensamples e bons respiz,
Qu’il vit en mer e en terre
Quant son filiol alat querre :
Ço fud Mernoc qui fud frerre
Del liu u cist abes ere,
Mais de ço fud mult voluntif
Que fust ailurs e plus sultif.
Par sun abeth e sun parain
En mer se mist e nun en vain,
Quer puis devint en itel liu
U nuls n’entret fors sul li piu :
Ço fud en mer en un’ isle
U mals orrez nuls ne cisle,
U fud poüz de cel odur
Que en paraïs gettent li flur ;
