Cette page n’a pas encore été corrigée
Icel qui est nostre heritét
Dun nus fumes deseritét.
Bien creit qu’ileoc ad grant glorie,
Si cum nus dit veire storie,
Mais nepurtant voldret vetheir
U il devreit par dreit setheir,
Mais par peccét Adam forfist,
Pur quei e sei e nus fors mist.
Deu en prïet tenablement
Cel lui mustret veablement ;
Ainz qu’il murget voldreit saveir
Quel sed li bon devrunt aveir,
Quel lu li mal aveir devrunt,
Quel merite il recevrunt ;
Enfern prïed vetheir oveoc
E quels peines avrunt ileoc
Icil felun qui par orguil
Ici prennent par eols escuil
De guerreer Deu e la lei ;
Ne entre eols nen unt amur ne fai.
Iço dunt lui pris est desir
Voldrat Brandans par Deu sentir.
