Le texte de cette page a été corrigé et est conforme au fac-similé.
Sic feminata virtus afflicta occidit.
Accede, nate, adsiste, miserandum adspice
Evisceratum corpus lacerati patris.
Videte cuncti ; tuque cœlestum sator,
Jace, obsecro, in me vim coruscam fulminis.
Nunc, nunc dolorum anxiferi torquent vertices,
Nunc serpit ardor : o ante victrices manus,
O pectora, o terga, o lacertorum tori !
Vestro ne pressu quondam Nemæus leo
Frendens efflavit graviter extremum halitum ?
Hæc dextra Lernam tetram, mactata excetra,
Placavit ; hæc bicorporem afflixit manum.
Erymanthiam hæc vastificam abjecit helluam,
Hæc a Tartarea tenebrica abstractum plaga
Tricipitem eduxit Hydra generatum canem ;
Hæc intercessit tortu multiplicabili
Draconem, auriferam obtutu observantem arborem.
Multa alia victrix nostra lustravit manus,
Nec quisquam e nostris spolia cepit laudibus.
Cicéron, Tusculanes, II, c. 8.
