ot deslivré Auvergne des ennemis du royaulme, lequel avoit de coustume en tous ses fais de louer Dieu, et très-dévot estoit à la vierge Marie : et pour ce, après la prise des places, s’en alla en pellerinage à Nostre-Dame d’Orcival[1], et illec offrit son pennon, qui encores y est, lequel il avoit voué quand il le vit premier sur la Roche Senadoire[2], pour ce que c’estoit la première place près de la aourée de Nostre-Dame, et là fonda le duc une messe perpétuelle. Et faicte son oblation, se partit et alla à Ardes[3] vers le conte Daulphin, qui le festoya moult grandement et d’Ardes alla au Puy-Nostre-Dame, ou il s’estoit voué. Et lui estant au Puy à son pellerinage, et ja y ot demouré deux jours pour sa devocion, vint à lui ung herault honnorable, de par le roi Henri d’Espaigne, qui apporta lettres au duc de Bourbon, les plus belles qu’on peust voir, ou ledit roi Henri prioit et requéroit au duc de Bourbon qu’il lui pleust de venir en Espaigne, et que le duc y avoit bien son venir : car la seigneurie de Bourbon l’avoit fort aidé à conquester son royaume, c’est assavoir le conte de la Marche, qui estoit du sang et des armes de Bourbon : « Et pour la grant renommée, bonne chevalerie, preudhommie et sagesse que j’ai oui dire de vous, je vous envoye mon especial hérault Moniquot, vous certiffiant par mes lettres patentes que mon intention et mon emprinse est, à l’aide de Dieu, entrer en Grenade en la saison nouvelle, à toute la puissance d’Espaigne, et sur toute rien désirerois vostre compaignie. A laquelle chose je vous prie que ne me vueillez faillir, et vous plaise amener avecques vous deux ou trois cens chevaliers et escuiers, et je vous promects que je vous despartirai de mes biens tout ce que vous en vouldrez prendre. » De quoi le duc Loys de Bourbon fut moult lie et joyeulx, et lui sembloit que Dieu l’emportoit, quand il véoit chose honnorable en quoi à la saison nouvelle il se peust employer. Et sur cela deslivra le duc de Bourbon le hérault du roi nommé Moniquot, et lui donna un escusson de ses armes, et de riches vestures de drap d’or, et sa devise, et l’en envoya ; et escript le duc ses honnorables lettres par ledict hérault au roi d’ESpaigne : que au plaisir de Dieu, il seroit devers lui, dedans la fin de mai ; et sur ce s’en revint le duc en son pais de Bourbonnois pour mettre en ordonnance à fere son voyaige…
Au cours de l’année 1380 le connétable Duguesclin arriva au Puy avec des gentilshommes du duc de Bourbon, et de notre
- ↑ Commune du canton de Rochefort, arr. de Clermont (Puy-de-Dôme).
- ↑ La Roche Senadoire, commune et canton de Rochefort.
- ↑ Chef-lieu de canton, arr. d’Issoire (Puy-de-Dôme).
