Le document suivant produit par M. Henry Mosnier atteste que la fabrication de la poudre s’effectuait déjà au Puy, en 1593, dans d’assez grandes proportions.
L’an mil cinq-cens-quatre-vingtz-treize et le XXVIIIe jour du moys de janvier, après midy au règne… en présence de moy notaire royal, establis en leurs personnes noble Claude de Polalhon sieur de Bouzols, d’une part et Benoist Charentus dict Merly, Pierre Boyer, Loys Galien, Pierre Giraud, Martin Colin, Jacques Bringier, Claude Besses, Michiel Marchadier, Mathieu Delever, Loys Colin, maistres poldriers de la présante ville, d’autre, lesquels parties de leur franche et libre volunté ont passé les pactes qui s’ensuyvent.
C’est que toutz lesdicts susnommés poldriers seront tenus comme ont promis travalher durent et pendant ung an à fère poldres tant fines que grosses et salpetre, commencent cejourd’huy et semblable jour finissant, et toutes la poldre et salpetre que pendant led. temps sera faicte seront tenus iceulx poldriers icelles balher et mettre es mains et pouvoir de noble Claude de Polalhon, sieur de Bouzols, comis à tenir le maguesin desdictes poldres par les consuls de la présente ville, ce que lesdicts maistres poldriers seront tenus fère, et ne la porront vendre ni balher à aultres à peyne de confiscation de tout ce que se treuvera es mains et povoir d’aultre que dudict sr de Bouzols, et lad. poldre ou salpetre estant saisie ou treuvée en leurs mains, celuy que se treuvera l’avoir vendue sera tenu rendre les deniers qu’il en aura receu à l’achepteur ou tel aultre que par messieurs du conseil sera advisé et en seront contrainctz à peyne de prinse, lesd. poldres et salpetre prinses seront confisquées ou seront aux habitans de lad. ville n’excèdent la vente d’une livre à chacun.
Soient tenus faire lesd. poldres tant grosses que fines et salpetre raffinée et sans aucune fraude ains que le tout soit bon lorsque sera balhé aud. sr de Bouzols à peyne de confiscation.
