tilz et responses par luy faictes a aucuns desdicts articles, et particulièremt touchant le désintéressemt desdicts seigneurs comtes pour leurs droictz seigneuriaux, pour la perte qu’ilz pourroient souffrir a cause dudict nouveau establissemt, l’exécution d’iceux auroit esté différée, et en partye, a cause de l’absance dudict seigneur marquis. Lequel finallement, par plusieurs de ses missives et parolles verballemt portées de sa part, se seroit remis à l’entière dispozition et liquidation qui seroit faicte par lesdictz seigneurs comtes touchant ledict désintéressemt, et par autre acte capitulère du troiziesme décembre mil six centz cinquante huict ; la dicte taxe et liquidation ayant esté faicte à la somme de trois milz cinq cents livres, sçavoir : deux milz liures payables au trésorier dudict Chappitre lors de la passassion du contract, et quinze centz livres applicables pour les réparations de leur chappelle sainct Julhen, avec les autres réserves contenues ausdictes actes capitulères.
« Icelluy seigneur marquis en seroit demeuré d’accord, et apprés plusieurs remises et conferances, tant en ceste dicte ville qu’en celle de Sainct-Flour, autres articles auroient esté dressés, en présence dudict seigneur marquis, par l’aduis commun de leurs conseils, le second juin de la présente année mil six centz cinquante-neuf, qui contiennent en substance l’intention des partyes concernant ledict establissement dudict nouveau monnastère ; pour faciliter lequel lesdictz seigneurs comtes, à l’instante prière et supplication des humbles et dévotes mère Jeanne Françoise de Byron, supperieure pour lors du monastère de la Vizitation saincte Marie de Sainct-Flour, sœur Marie-Louize-Dorothée d’Allègre et autres sœurs de ladicte communauté, auroient eu pour agréable et donné leur permission de se transporter en ceste ville de Brioude, en tel nombre que Monseigneur l’Euesque de Sainct-Flour jugeroit necessaire, pour la direction et institution dudict nouveau monnastère, soubz l’aucthorité et juridiction desdicts seigneurs comtes ; et à ses fins ledict seigneur euesque ayant décerné son mandat du quinziesme du présant mois de septembre, portant nomination de la dte sœur Jeanne-Françoise de Byron esleue
