en signe de prinze de possession et installation en icelle por joyr par les dictz révérandz Pères Mynymes, des droictz à eulx donnés et acquitz par la dicte fondation : don a esté faict lecture et faict entendre à haulte voix, en présence de tout le peuple y assemblé ; et l’acistance et suytte desquels toujours en faveur de pocession.
Après les bénédictions acostumées, le révérend Père Humblot, provincial susdict, a mys et pozé la dicte croix de boix, aportée despuys l’esglize St Julhen-de-Brioude jusques au dict St Ferryol. Et ce a esté entre l’esglize St Julhen, estant au dict St Ferryol, et près la fonteyne et les maisons de St Ferryol.
La dicte croix y ayant esté plantée à ung creux, que y a esté faict, que a esté premier pioché par le sieur doyen et aultres quatre des dicts sieurs comptes.
Et ayant esté tout cy dessus faict, le révérend père Humblot, provincial, est monté en chere, ou dict St Ferryol, et illec faict sa prédication et exzortation à tous les adcistantz en la d. procession avec grand attemption, et à leur contemptement. —
Au sortir de la quelle et de séans le peuple, avec grand joye et allégresse, lhoua et remercya Dieu d’une telle fondation, par l’espérance du bien que en réussira et qu’il expère en recepvoyr à leur grande consolation, et de leur conserver. — Et après, les dicts Pères Mynymes s’en sont retournés avec les sieurs comptes, doyen, chanoynes obdomadiers, dymy prébandiers, choriers et tous les autres adcistans à la dicte procession et prédication, en la dicte ville de Brioude, esglize monsieur St Julhen ; contignuant toujours la dicte procession ; avec actions de grâces estans entrés dans la dicte esglize.
Dont et de tout ce que dessus, et requérans les dictz révérends Pères Mynymes, par nous Anthoine Chaudon et Estienne Pradon, noteyres royaulx à Brioude, soubssignés, leur avons octroié instrument ces présentes, pour leur valoyr et servyr en temps et lieu ce que de raison. Le tout faict en présence de vénérable personne messire Jehan Béraud, prestre seculher du dict
