SONNET.
Tovt ainſi puiſſiez-vous, rigoureuſe beauté,
Conſeruer par cent ans le teint de voſtre face,
Que le lis & l’œillet y prenne touſiours place,
Que l’or de voſtre chef ne ſoit onc argenté,
Et qu’encor ce bel œil dont ie ſuis agité
Ne terniſſe iamais le feu de ſon audace,
Comme ie gaignerai le bien de voſtre grace,
Adouciſſant le fiel de voſtre cruauté.
Que ie crains qu’vn moſqueur vueille un iour entreprendre
De dire en ſe gauſſant, voi ton flambeau en cendre ;
La beauté eſt un bien qui dure peu de iours.
Voulez-vous bien punir & le ris & l’enuie,
Amolliſſez un peu le tyran de ma vie,
Et ie vous fai vn aſtre eſclairant à touſiours.
MVZAIN A VNE COVRTISANE.
Vn pot d’argent ſur la feneſtre,
Signal de voz lubricitez,
Mignonne, me fait bien cognoiſtre
Que l’argent dompte voz fiertez,
Ie vous treuue bien aduisée
D’auoir meſpriſé mon Laurier
Par qui la vertu eſt priſée :
Mais vous eſtes mal aduiſée
D’auoir pris ſi tard vn Banquier.
