SONNET.
Mon eſpoir prompt monté sur mes ſeruices,
Branſlant le dart de ma fidelité,
Armé à crud de mon integrité,
Entroit pompeux dans la porte des lices :
De l’autre part monté sur mes ſupplices,
Le deſeſpoir fier d’inhumanité,
Tenoit en main la longue infinité,
De vos rigueurs, couuert de vos malices :
L’Amour heraut incitoit les guerriers,
Foudres portants cent mille coups meurtriers,
Grands coups fourrés, vrays teſmoins de leur ire :
Depuis trois iours ils ſe ſont combattu,
Et nul des deux n’eſt encor abbatu,
L’vn d’eux vaincra ſi vous daignez m’eſcrire.
MVZAIN.
Quand ie rauis de votre bouche,
Le baiser qui me fut si doux
Que mon ame en ceſte eſcarmouche,
Abandonna mon ſein pour vous ;
Ie pris pour elle tant de flamme,
Durant cet amiable effort,
Que ceſte flamme me ſert d’ame :
Sans elle dites moy, madame,
Seroi-ie pas vn homme mort ?
