comme celles d’vn flambeau qui s’eſteint, qui ordinairement font les plus claires : & que vous trouuiez dans ces Vers que ie vous preſente, autant de feu qu’il y en auoit dans mon ame quand ie les ay compoſez. Que ſi vous remarquez au premier Sonnet de ce Volume, & en quelques autres, que le huictieſme Vers eſtant maſculin, le neufieſme l’eſt encore : ſouuenez vous qu’il y en a dans tous les Poètes qui ont eu de la réputation qui ſont faits ainſi : & que depuis Ronſard iuſques à moy, ie vous en puis fournir des exemples. Ie vous dis la meſme choſe de quelques autres Sonnets, où la rime des quatre premiers Vers eſt d’vne couleur, & celle des quatre qui les ſuiuent d’vne autre : car Ronſard, Du Bellay, Des Portes, Du Perron, Bertaut, Malherbe, Théophile, & Mainard, ont manqué les premiers ſi i’ay manqué, & ie ne l’ay fait qu’apres le leur auoir veù faire. Voila, Lecteur, tout ce que i’ay à vous dire en proſe de mes Vers : ne voulant preuenir voſtre iugement, ni par vne louange orgueilleuſe, ni par vne humilité affectée.
Page:Scudery - Poésies diverses, 1649.djvu/12
Le texte de cette page a été corrigé et est conforme au fac-similé.
