qu’elles l’avoient meſme veuë depuis que leur Maiſtresse eſtoit ſortie. En ſuitte elles accuſerent Timeſias comme Amant d’Alcidamie de l’avoir priſe : & ſe mirent à le prier de la remettre dans ſa Boiſte. Luy s’en deffendit avec chagrin : & pendant cette conteſtation, Acaſte revint chez elle, & aprit la choſe. D’abord elle creut ce que ſes Femmes luy dirent : & s’imagina que ſon Parent qu’elle sçavoit eſtre tres amoureux d’Alcidamie, l’avoit effectivement priſe : & quoy qu’il luy peuſt dire, elle ne voulut jamais le croire : de ſorte qu’elle s’en faſcha extrémement contre luy. Neantmoins comme il luy jura fortement qu’il n’avoit pas pris ce Portrait, on s’informa qui eſtoit venu chez Acaſte : Mais ſes femmes qui vouloient s’excuſer de leur negligence, jurerent & proteſterent auſſi bien que les autres Domeſtiques, qu’il n’y eſtoit venu que Timeſias. Cependant Theanor pour ne laiſſer nul ſoubçon de luy, retourna chez Acaſte, pour luy dire adieu : & ſans luy teſmoigner qu’il y eſtoit deſja venu auparavant, elle luy fit ſes pleintes de la perte qu’elle avoit faite : & il luy reſpondit malicieuſement au lieu de la conſoler, que s’il en euſt perdu autant, il en ſeroit mort de douleur. Enfin il partit avec ce threſor caché : & faiſant ſervir à ce Portrait une Boiſte qu’il avoit, qui s’y trouva aſſez juſte ; parce que l’on fait preſque tous les petits Portraits de meſme grandeur : il s’embarqua auſſi ſatisfait, que Timeſias eſtoit chagrin : Car il s’imaginoit bien que c’eſtoit quelqu’un de ſes Rivaux qui avoit dérobé cette Peinture. Cependant Alcidamie ayant sçeu la choſe, ſoubçonna d’abord Acaſte de l’avoir donné à ſon Parent : mais enfin elle luy fit bien connoiſtre que cela n’eſtoit pas : car eſtant touſjours perſuadée qu’il l’avoit priſe elle rompit avec luy à ſon
Page:Scudéry - Artamène ou le Grand Cyrus, troisième partie, 1654.djvu/259
Cette page n’a pas encore été corrigée
![](http://upload.wikimedia.org/wikipedia/commons/thumb/c/c3/Scud%C3%A9ry_-_Artam%C3%A8ne_ou_le_Grand_Cyrus%2C_troisi%C3%A8me_partie%2C_1654.djvu/page259-1024px-Scud%C3%A9ry_-_Artam%C3%A8ne_ou_le_Grand_Cyrus%2C_troisi%C3%A8me_partie%2C_1654.djvu.jpg)