Page:Scudéry - Artamène ou le Grand Cyrus, seconde partie, 1654.djvu/92

mon Maistre, il faut retourner au Champ de Bataille : & vous dire que lors que ces deux Soldats dont je vous ay desja parlé, l’avoient veû passer, il estoit vray, comme ils l’avoient creû, qu’il estoit desja blesse à l’espaule gauche : & que cependant il ne laissa pas de poursuivre le Roy de Phrigie, jusques au bord de la riviere de Sangar. Comme ce Prince qui se retiroit, eut passe un petit pont de bois, qui estoit en cet endroit dont je parle ; la multitude de ceux qui fuyoient, & qui vouloient passer tout à la fois aussi bien que luy : fit que ce pont rompit, lors qu’il n’y avoit pas encore la moitié des siens de l’autre costé de l’eau. Mais ce qui sembla luy rendre un mauvais office, luy en rendit sans doute un bon : parce que cet accident arresta mon Maistre : & l’empescha de continuer de le poursuivre. Cependant ceux qui estoient demeurez au deça du pont rompu, redoublant leur valeur par le desespoir de se sauver, se deffendirent opiniastrément ; d’autre costé Artamene qui estoit en colere que ce Prince luy fust échappé, les attaqua avec une ardeur inconcevable ; & de part & d’autre ils commencerent un nouveau combat. Quelques uns de ceux qui avoient suivy le Roy de Phrigie, & qui s’estoient arrestez à l’autre bord de la riviere, comme s’y croyant en sureté, taschoient de secourir les leurs à grands coups de traits, qu’ils tiroient de l’autre costé du fleuve, sans que l’on peust aller à eux, à cause de sa profondeur ; ny leur rendre la pareille, parce qu’Artamene n’avoit point alors d’Archers aupres de luy. Enfin presque tous ceux qui combattoient estans morts, & le jour allant finir ; un de ces traits qui estoient tirez de l’autre costé