Page:Scudéry - Artamène ou le Grand Cyrus, seconde partie, 1654.djvu/669

dans le Chaſteau des Troupes rebelles : ſi bien que le lendemain au matin les Amis d’Artamene furent bien eſtonnez de voir dans l’une & dans l’autre des Soldats qu’ils ne connoiſſoient point. Cependant Chriſante, Ortalque, Artucas, Andramias, Araſpe, & Marteſie, eſtoient bien empeſchez à reſpondre aux queſtions que leur faiſoit Metrobate, ſur trois choſes qu’il leur demandoit : l’une, qui eſtoit Artamene ? l’autre, quelle eſtoit l’intelligence qu’il avoit avec le Roy d’Aſſirie ? & la derniere, quand avoit commencé celle qu’il avoit avec Mandane ? Chriſante qui craignoit de nuire à ſon Maiſtre en diſant qu’il eſtoit Cyrus, & qui aprehendoit en meſme temps de luy nuire encore s’il laiſſoit croire qu’il fuſt d’une naiſſance obſcure, prenoit un milieu entre ces deux extremitez : & diſoit qu’il eſtoit d’une naiſſance tres illuſtre, mais qu’il ne luy eſtoit pas permis d’en dire autre choſe. Que quant à ce qui eſtoit de l’intelligence du Roy d’Aſſirie avec Artamene, elle eſtoit avantageuſe à Ciaxare, au lieu de luy eſtre dommageable, mais qu’il n’en diroit rien de plus particulier que cela. Que pour la Princeſſe Mandane elle eſtoit aſſez obligée à Artamene, puis qu’elle luy devoit la vie du Roy ſon Pere, & tant de victoires qu’il avoit remportées pour luy, pour ne devoir pas trouver eſtrange qu’elle l’eſtimast : mais qu’il n’en sçavoit pas davantage. Ortalque de ſon coſté, diſoit ne sçavoir nulles particularitez de ce qu’Artamene avoit mandé au Roy d’Aſſirie, ſinon qu’il sçavoit bien qu’il ne traitoit rien aveque luy qui fuſt contre le ſervice du Roy : & qu’enfin ils n’eſtoient nullement Amis. Andramias ne pouvoit reſpondre que non, à tout ce