Page:Scudéry - Artamène ou le Grand Cyrus, seconde partie, 1654.djvu/662

Ariobante, Gadate, Artibie, Hidaſpe, Aduſius, Agiatidas, Gobrias, Madate, Artabaſe, Leontidas, Megabiſe, Thimocrate, Philocles, & beaucoup d’autres s’y rendirent, mais on leur dit qu’on ne voyoit pas le Roy. Toutefois comme ils craignoient quelque reſolution violente, ils preſſerent tant, qu’enfin il commanda que l’on fiſt ſeulement entrer le Roy de Phrigie & le Roy d’Hircanie dans ſon Cabinet, où ils le trouverent avec un chagrin extréme. Seigneur (luy dit le Roy de Phrigie qui ne le vouloir pas irriter davantage) nous venons icy pour sçavoir ſi voſtre Majeſté a beſoin de nous : Ouy, reſpondit ce Prince en colere, & je ne penſe pas que vous ſoyes plus long temps les protecteurs d’un ingrat, d’un temeraire, & d’un ambitieux comme Artamene : qui n’eſt venu dans ma Cour, que pour me deſhonnorer : & qui a eu l’audace de lever les yeux juſques à ma Fille. Tous ſes Raviſſeurs, pourſuivit il, ſont moins dignes de ma haine que luy, qu’enfin en l’enlevant ils ne luy ont rien fait faire indigne d’elle : mais cét inſolent en luy raviſſant le cœur, luy a fait un tort irréparable, & m’a mortellement offenſé. Le Roy d’Aſſirie, pourſuivit il, tout eſtranger qu’il eſtoit pour elle, & tout Ennemy des Medes qu’il eſt encore, eſt pourtant touſjours un Grand Roy. Le Roy de Pont quoy qu’il ait perdu deux Royaumes, n’a pas perdu ſa qualité : le Prince Mazare eſtoit auſſi de naiſſance Royale, & devoit porter une Couronne : mais pour Artamene, il eſt ſans doute nay dans les fers : ſes Peres ont tous eſté Eſclaves : car ſi cela n’eſtoit pas, il n’auroit pas caché ſa condition comme il a fait. Seigneur, reprit le Roy de Phrigie, Artamene à fait des actions à la guerre, qui marquent ce me ſemble aſſez qu’il eſt