de colere, il fit prendre cinquante de ſes Gardes à Metrobate, pour executer ſes volontez, auparavant que ce qui c’eſtoit paſſé à la chambre d’Artamene fuſt sçeu de tout le monde. Andramias revenant au Chaſteau comme Metrobate en alloit ſortir, en fut aiſément arreſté, auſſi bien qu’Ortalque qui l’accompagnoit. De là s’en allant prendre Artucas qu’il trouva chez luy, il y rencontra Chriſante qui eſtoit avec Marteſie, & les arreſta tous trois : faiſant conduire Marteſie & une Femme pour la ſervir, dans un Chariot juſques au Chaſteau ; & faiſant mener Chriſante & Artucas à pied. En ſuitte il fut chercher Feraulas, mais il ne le trouva point : car par bonheur ayant eſté adverti que Metrobate avoit eſté à la chambre de ſon Maiſtre acconpagné de Gardes, il eſtoit allé chez Hidaſpe pour le luy aprendre, ou il trouva le Roy de phrigie. Un moment apres qu’il y fut arrive, ils sçeurent qu’Andramias eſtoit arreſté : qu’Ortalque l’eſtoit auſſi : que Marteſie, Chriſante, & Artuças, eſtoient retenus dans le Chaſteau : & qu’Artamene eſtoit gardé plus eſtroitement qu’il n’avoit jamais eſté. De ſorte qu’aprenant toutes ces choſes en meſme temps ; & sçachant que Metrobate avoit eſté chercher Feraulas chez luy, le Roy de Phrigie ne voulant point qu’il ſortist de chez Hidaſpe, luy fit comprendre qu’il ſeroit beaucoup plus utile à ſon Maiſtre en liberté, que s’il eſtoit en priſon.
Ce Prince ayant envoyé en diligence advertir tous les illuſtres Amis d’Artamene, ils ſurent chez le Roy avec une precipitation extréme : pour sçavoir par quelle voye un changement ſi ſubit eſtoit arrivé. Le Roy de Phrigie, celuy d’Hircanie, Perſode, Thraſibule, le Prince de Paphiagonie, celuy de Licaonie,
