Pendant cette curieuſe recherche, Metrobate eſtoit deſesperé de ne trouver rien contre Artamene, & Ciaxare en eſtoit bien aiſe : mais tout d’un coup ayant ouvert un petit Coffre d’or eſmaillé, Ciaxare qui le prit des mains de Metrobate, vit que le Portrait de Mandane eſtoit de dedans : à l’entour duquel il y avoit un Deviſe en Capadocien, qui diſoit JE SUIS MIEUX DANS VOSTRE CŒUR. Car ce Portrait avoit eſté fait pour une Princeſſe de Capadoce, que Mandane aimoit beaucoup, & de laquelle elle eſtoit tendrement aimée : de ſorte que cette Princeſſe eſtant morte ſans avoir eu ce Portrait, elle l’avoit donne à Marteſie, qui le luy avoit demandé. Mais helas, quelle ſurprise fut celle de Ciaxare de trouver cette Peinture ! & quelle joye fut celle de Metrobate, devoir qu’il eſtoit bien plus heureux qu’il ne penſoit l’eſtre.
Si le Roy euſt eu l’eſprit tranquile, il s’en fuſt aiſément aperçeu : mais ce Prince avoit l’ame ſi troublée, qu’il ne sçavoit ce qu’il faiſoit ny ce qu’il voyoit. Il leut pourtant cette innocente Deviſe, qu’il croyoit ſi criminelle : puis il s’écria tout d’un coup, Quoy Mandane a pû dire une pareille choſe à Artamene ! Quoy cette vertu ſi ſevere en apparence, a pû ſe reſoudre à imaginer une pareille galanterie en faveur d’un ſimple Chevalier, qui erre parmi le monde ſans eſtre connu ! Ha ſi cela eſt, comme il n’eſt que trop vray, Mandane a bien pu concevoir d’autres deſſeins : elle eſt peut-eſtre : diſoit il, cachée chez Artucas, où elle attend qu’Artamene ſoit delivré :
