Page:Scudéry - Artamène ou le Grand Cyrus, seconde partie, 1654.djvu/645

par Artamene : car il le connoiſſoit pour eſtre à luy : & pour luy avoir porté les ordres du Roy lors qu’il eſtoit en Bithinie. Celuy qu’il envoya à Metrobate eut commandement de n’entrer point dans Sinope de peur qu’il ne fuſt arreſté : & d envoyer ſeulement quelqu’un avec adreſſe, l’advertir de ſe rendre au Temple de Mars où il l’attendroit. Metrobate ayant reçeu cét advis, ne manqua donc pas d’y aller ; mais à peine eut il apris parce Confident d’Artaxe, le voyage d’Ortalque à Pterie, qu’il commença de concevoir quelque eſpoir de troubler la joye publique. Car il sçavoit qu’Ortalque eſtoit à Sinope : & qu’ainſi l’on pourroit s’aſſurer de luy. Mais comme il avoit pluſieurs choſes à dire à cét homme, & qu’il craignoit d’eſtre veû en ſa compagnie dans un lieu auſſi frequenté qu’eſt un Temple ; ils furent ſe promener au bord de la Mer : & juſtement au meſme lieu où Artamene avoit eſté quelque temps auparavant, lors qu’il avoit trouvé des marques du naufrage de la Princeſſe. Eſtant arrivez vis à vis de la meſme Cabane où le Prince Mazare avoit eſté porte, & où l’on avoit dit depuis à Artamene qu’il eſtoit mort : il y fut avec intention de chercher quelque pretexte pour s’y repoſer, afin de pouvoir eſcrire à Artaxe en ce lieu là, ayant des Tablettes dans ſa poche deſtinées à cét uſage. Mais comme le hazard fait quelquefois des prodiges, les Peſcheurs qui demeuroient dans cette Cabane, & qui s’eſtoient affectionnez à Artamene, quoy qu’il n’euſt eſté qu’un moment chez eux : voyant un homme comme Metrobate, prirent la liberté de luy demander s’il eſtoit vray que l’on allaſt delivrer Artamene, comme on le leur avoit dit à la Ville, &