car il vouloit regarder la rivage, afin d’y conduire pluſtost ſa chere Policrite : Et il y avoit auſſi des momens, où croyant mourir ſans la pouvoir ſauver, il vouloit du moins la voir en mourant. Il regardoit donc tantoſt vers la Terre, & tantoſt vers Policrite : & les choſes eſtoient en cét eſtat, lors que les Gens de Philoxipe & de Solon qui eſtoient demeurez fort loin derriere, à cauſe de quelque petit accident advenu à un de leurs chevaux, arriverent : entre leſquels s’eſtant trouvé un Eſcuyer de Philoxipe qui sçavoit nager, il ſe je tta à l’eau en diligence : & fut aider à ſon cher Maiſtre à conduire Policrite au bord : où ce Prince ne fut pas ſi toſt, que la force luy manquant, il tomba eſvanoüy.
De vous dire comment il fut ſecouru de Solon, de Megiſto, & de tout ce qui ſe trouva ſur le rivage, je penſe qu’il ſeroit ſuperflu : eſtant aiſé à s’imaginer qu’apres une ſemblable action, il en fut bien aſſisté. Pour Policrite elle eſtoit ſi ſurprise & ſi affligée de l’eſtat où elle voyoit Philoxipe, qu’elle ne ſentoit point la joye d’eſtre eſchapée d’un ſi grand peril. Mais enfin, apres que l’on eut porte Philoxipe dans une de ces Cabanes ; que par les remedes qu’on luy eut faits, il fut revenu de ſa foibleſſe ; & qu’on luy eut ſeché ſes habillemens ; il demanda où eſtoit Policrite ? que Solon fit venir d’une petite Chambre où elle s’eſtoit retirée : quoy qu’elle ne fuſt pas encore bien remiſe, & de la frayeur qu’elle avoit euë pour elle, & de celle qu’elle avoit euë pour Philoxipe. Mais enfin, apres que tous ceux qui eſtoient dans cette Cabane ſe furent retirez, à la reſerve de Megiſto, de Policrite, de Doride, de Philoxipe, & de Solon : ce dernier pria Megiſto de luy dire pourquoy elle avoit quitté la Cabane qu’il luy avoit
