Page:Scudéry - Artamène ou le Grand Cyrus, seconde partie, 1654.djvu/512

que celle du Roy ne luy avoit eſté difficile. De ſorte que cette Princeſſe agiſſoit avec beaucoup d’eſprit & de retenuë : & méfiant touſjours la ſeverité à la douceur, le Roy eut tres long temps beſoin de l’aſſistance de Philoxipe : pour lequel Aretaphile qui sçavoit le credit qu’il avoit aupres de luy, avoit toute la complaiſance & toute la civilité poſſible. Il y avoit pourtant des jours, où Philoxipe eſtoit en un chagrin eſtrange, de la longueur de cette paſſion : & où pour s’en conſoler, il s’en alloit a une admirablement belle Maiſon, que le fameux Solon luy avoit fait baſtir aupres de Soly ; & dans laquelle il avoit ramaſſé tout ce que la Grece avoit de plus rare & de plus curieux, ſoit pour la Peinture ou pour les Statuës. C’eſtoit donc en ce lieu là que l’on appelle Clarie, où s’eſtonnant quelque fois de la paſſion du Roy, il me faiſoit l’honneur de ſe pleindre à moy aſſez ſouvent, de l’employ qu’on luy donnoit : & il me donnoit luy meſme cent agreables marques de ſon inſensibilité, par les plaiſantes choſes qu’il me diſoit contre l’amour. Cependant quoy que le Roy fuſt fort amoureux d’Aretaphile, il avoit pourtant quelque peine à ſe reſoudre de l’eſpouser : parce qu’en effet il y avoit plus de raiſon d’eſpouser la Princeſſe Thimoclée ; à cauſe de quelques droits qu’elle pretendoit avoir, à la Principauté d’Amathuſe, Si bien que cette irreſolution eſtant dans l’eſprit du Roy, il n’avoit point encore dit ny fait dire à Aretaphile, qu’il ne l’aimoit, que pour la mettre ſur le Throſne. Mais ſeulement ſuivant la couſtume de Chipre, il s’eſtoit aſſez aſſujety aupres d’elle : & avoit fait pour gagner ſon eſtime, tout ce qu’un Prince bien fait & plein d’eſprit comme il eſt, pouvoit faire eſtant ſecondé de Philoxipe : qui