Page:Scudéry - Artamène ou le Grand Cyrus, seconde partie, 1654.djvu/494

davantage & pour gagner temps ; diſoit à Ciaxare qu’Artamene commençoit de ſe laiſſer vaincre : & deſcouvriroit à la fin ce qu’il vouloit sçavoir. Ce genereux Priſonnier de ſon coſté, mouroit d’impatience d’eſtre delivré, afin de pouvoir delivrer Mandane : Mais quoy que ſon amour occupaſt toute ſon ame, il n’oublia pas qu’Araſpe eſtoit dans les fers auſſi bien que luy : & il envoya pluſieurs fois sçavoir de ſes nouvelles ; & luy teſmoigner que ſa priſon augmentoit la rigueur de la ſienne. Il fut pourtant extraordinairement ſoulagé, lors que Chriſante & Feraulas eſtant allez le trouver qu’il eſtoit encore au lict, luy eurent apris que Marteſie eſtoit à Sinope. Je Nom de Marteſie luy fit faire un cry de joye, s’imaginant que peut eſtre le Princeſſe n’en eſtoit elle pas fore ſoing : & le recit qu’ils luy firent en ſuite, des avantures de Mandane, & de ſa fidelité pour luy ; fit un renverſement ſi grand dans ſon ame, qu’il n’eſtoit pas capable de ſentir avec tranquilité, le tranſport & le plaiſir qu’une ſi aimable nouvelle luy donnoit. Car afin de ne le troubler point, & de le luy laiſſer gouſter tout pur, Chriſante & Feraulas ne luy dirent pas l’Oracle que le Roy d’Aſſirie avoit reçeu à Babilone : bien eſt il vray qu’il trouva une autre voye de le moderer, par l’inquietude qu’il eut de sçavoir que la Princeſſe eſtoit en la puiſſance du Roy de Pont, de qui le rare merite luy eſtoit aſſez connu, N’admirez vous point Chriſante, diſoit il en le regardant, le caprice de ma fortune, qui fait que j’ay pour Rivaux, les plus honneſtes Gens du monde, & les plus raiſonnables dans leur amour ? Car enfin ſi Mandane eſtoit aimée par de ces Princes de qui la paſſion eſt brutale juſques à la fureur ; & qui ne parlent que de violences,