la pitié que luy faiſoit Mazare la retenoit : puis tout d’un coup formant la reſolution d’apeller ceux qu’elle rencontreroit les premiers, elle trouvoit qu’elle n’en avoit pas la force & qu’elle deliberoit ſur une choſe qui luy eſtoit impoſſible.
Pour moy je sçay bien qu’il n’euſt pas eſté en ma puiſſance de prononcer une parole : & de l’heure que je parle. Chriſante, quand je me ſouvuiés de l’eſtat où nous eſtions, l’en fremis encore d’eſtonnement & de frayeur. Car Car enfin nous entre-voiyons dans la Campagne, des Tentes, de Sentinelles, des Corps de gardes, des Gens qui marchoient, & d’autres qui eſtoient arreſtez. Cependant le Roy d’Aſſirie qui eſtoit le Guide, prenoit tantoſt à droit, tantoſt a gauche, & eſvitoit avec beaucoup d’adreſſe tout ce que la blancheur de la neige luy faiſoit deſcouvrir. Mais Chriſante, pour ſortir promptement d’un lieu qui me donna tant de peine, je vous diray qu’apres avoir eſvité cent & cent fois de rencontrer des Troupes de Ciaxare ; comme nous n’eſtions plus qu’à deux ſtades d’un Bois, dans lequel le Roy d’Aſſirie n’auroit plus rien eu à craindre, parce qu’il eſt fort eſpais, & qu’il en sçavoit tous les deſtours, y ayant eſté ſouvent à la Chaſſe ; le cheval ſur lequel eſtoient Mazare & la Princeſſe ſe mit à hennir avec violence, juſtement à quarante pas d’un lieu où il y avoit une Compagnie d’Archers à cheval logez : qui ayant eu ordre de s’aprocher de Babilone, quittoient leur Quartier, pour y aller en diligence. Quelques uns de ces Archers qui eſtoient deſja à cheval, ayant entendu ce henniſſement d’un coſté où ils sçavoient qu’il ne devoit y avoir perſonne des leurs, prirent l’allarme, & s’avancerent vers l’endroit où ils avoient entendu ce bruit. Mais ne voyant
