Page:Scudéry - Artamène ou le Grand Cyrus, seconde partie, 1654.djvu/44

le Prince Tigrane mesme, voulut estre de là partie, & se ranger parmy les Volontaires, dont il fut le Chef. Nous fismes une diligence extréme : mais comme Artamene n’avoit pû estre parfaitement informé de l’estat où estoient les Ennemis ; comme nous fusmes à cinquante stades de la Plaine de Cerasie, il envoya Chrisante aux nouvelles, accompagné de dix ou douze seulement : afin d’aprendre si les partages estoient libres ou occuppez : & si son Armée estoit desja enfermée par celle du Roy de Pont, & par les Troupes de Phrigie. Cependant il falut faire alte, à un petit Vilage deshabité, où l’on eust pû se deffendre, en cas que les Coureurs des Ennemis y fussent venus : Nous trouvasmes parmy ces Mafures quelques Paisans cachez, qui nous assurerent de nouveau, que les Rois Confederez avoient deux Armées tres puissantes : & que si la nostre n’estoit desja enfermée, elle la feroit bien tost. Artamene voyant donc les affaires de la guerre, en aussi mauvais estat que celles de son amour, estoit en une affliction que je ne vous puis exprimer : il ne pouvoit souffrir, que des Ennemis qu’il avoit si souvent battus, fussent en termes de le vaincre : & il se resolut du moins, de mourir plustost mille fois, que de survivre à sa deffaite si elle arrivoit. Non, disoit-il en luy mesme, je ne sçaurois me resoudre à revoir ma Princesse apres avoir esté vaincu : & si le malheur veut que je le sois, il faut se preparer à la mort. Moy, dis-je, qui apres de grandes Victoires, n’ay osé l’approcher qu’en tremblant : & qui n’ay jamais eu la hardiesse, apres avoir vaincu des Rois, de luy faire connoistre seulement, qu’Artamene estoit son Esclave.