ou s’il ne la verroit pas. La honte d’eſtre vaincu penſa l’en empeſcher : mais l’extréme envie de la revoir l’y contraignit, Joint qu’il imagina que peut-eſtre la pourroit il toucher par la pitié de ſon malheur.
Comme il n’eſtoit gueres bleſſé, il quitta le lict des le lendemain, & commença de ſe preparer à un Siege, & de donner tous les ordres neceſſaires pour le ſoutenir. Il s’imaginoit pourtant, que comme la Campagne eſtoit preſque ſur le point de finir, le Roy des Medes ne pourroit pas durant l’hyver prendre Babilone : & il eſperoit qu’il ſeroit contraint de lever le Siege, & de remettre la choſe au Printemps. Pendant quoy il feroit touſjours ce qu’il pourroit, pour gagner l’eſprit de Mandane, ſoit par la douceur ou parla crainte : & ſe prepareroit à une nouvelle Bataille. Pour nous Chriſante, nous ne gouſtions pas une joye toute pure : car nous voiyons Mazare ſi triſte, que cela nous faiſoit apprehender qu’il ne deſcouvrist dans l’eſprit du Roy d’Aſſirie quelques mauvaiſes intentions : joint qu’il eſtoit aiſé de concevoir, que le Siege de Babilone n’eſtoit pas une choſe que l’on peuſt faire ſans peril. Neantmoins cét heureux commencement nous donnoit touſjours quelques momens où la joye partageoit noſtre ame, & en chaſſoit la moitié de nos douleurs. Les Dieux, diſoit la Princeſſe, ſont trop equitables & trop bons pour nous abandonner : & je me fie beaucoup plus en leur juſtice, qu’en la force des Armes du Roy mon Pere, ny qu’en la valeur d’Artamene. Cependant nous traitions Mazare encore plus civilement qu’à l’ordinaire : car comme nous ne craignions rien tant que l’humeur violente du Roy d’Aſſirie. Mazare eſtoit la ſeule perſonne de qui nous eſperions
