Page:Scudéry - Artamène ou le Grand Cyrus, seconde partie, 1654.djvu/283

de celuy du Roy d’Hircanie, & de celuy du Roy d’Arabie : mais encore du Prince des Saces, de celuy des Paphlagoniens ; & des Indiens. Pour le Roy de Phrigie, il fut auſſi puiſſamment ſolicité de prendre le party de celuy d’Aſſirie, ſuivant le Traitté de paix qu’il avoit fait avec la Reine Nitocris. Mais comme il avoit guerre contre Creſus, & que ce Prince devoit aſſister le Roy d’Aſſirie auſſi bien que luy ; il fît dire au Raviſſeur de Mandane, qu’il eſtoit preſt de le ſecourir, pourveû que ſes Troupes ne fuſſent point meſlées avec celles des Lydiens ſes Ennemis : ce qu’on luy promit, & ce qu’on ne luy tint pas. Ce Prince euſt bien voulu ne ſe trouver pas engagé dans le party du Roy d’Affine : Mais n’ayant pas ratifié le Traité de Paix du Roy de Pont. qui l’euſt engage en celuy de Ciaxare ; il ſe reſolut à ce qu’il ne pouvoit empeſcher. Pour le Roy de Pont, il n’eſtoit pas en eſtat de prendre party : car il avoit une guerre civile dans ſon Royaume, qui l’occupoit eſtrangement : & qui le deſtruira ſans doute, ſi elle ne l’a deſja deſtruit. Voila donc, Seigneur, bien des Rois, & bien des Princes engagez dans le party le plus injuſte : De plus, Aribée voyant le Roy d’Aſſirie en poſſession du Throſne de ſes Peres, acheva de ſe declarer : & publiant dans la Province dont il eſtoit Gouverneur, que la Princeſſe avoit conſenty à ſon enlevement ; Il leva des Troupes ; r’apella Artaxe ſon Frere, que l’on avoit envoyé pour ſecourir le Roy de Pont, malgré les derniers ordres du Roy ; & acheva peut-eſtre de deſtruire ce Prince par là. Ayant donc fait un Corps conſiderable, il l’envoya à Babilone : outre cela, le Roy d’Aſſirie dépeſcha un Ambaſſadeur à Creſus, comme je l’ay