de luy remettre la conduite de la Capadoce, il n’avoit qu’à luy en envoyer l’ordre. Cependant le Roy eſtant adverty qu’Aribée ne ſe trouvoit point mal comme il diſoit, commença d’entrer en ſoubçon : & donna toute l’authorué à un homme de grande condition, nommé Ariobante ; ce qui acheva d’irriter Aribée, & de le faire reſoudre à tout ce qu’il a fait depuis. Artamene envoya Ortalque vers Artaxe Frere d’Aribée, luy commander de la part de Ciaxare, de continuer de ſervir le Roy de Pont.
Ciaxare fut donc à Ecbatane, & mon Maiſtre l’y accompagna : le Roy de Perſe envoya en ce meſme temps un Ambaſſadeur au Roy de Medie (car doreſnavant nous appellerons Ciaxare ainſi) pour s’affliger aveque luy, & de la mort d’Aſtiage, & de l’enlevement de la Princeſſe ſa fille : & quelques jours apres, un autre pour ſe reſjoüir de ſon heureux advenement à la Couronne, & pour luy offrir un puiſſant ſecours, afin de faire la guerre au Prince d’Aſſirie. Ce fut alors Seigneur, que Chriſante ſe trouva fort embarraſſé : il ne craignoit pas toutefois que mon Maiſtre fuſt reconnu, car il eſtoit ſans doute arrivé un aſſez grand changement en luy, auſſi bien qu’en moy, qui eſtois à peu prés de meſme âge : Mais il ne pouvoit pas douter, qu’eſtant beaucoup plus avancé en âge qu’Artamene, il ne fuſt connu pour ce qu’il eſtoit : de ſorte qu’il falut malgré luy, ſe reſoudre à dire un menſonge. Il dit donc à ces Ambaſſadeurs Perſans, en termes equivoques, que deſesperé de ne pouvoir remener en Perſe le Prince qu’il en avoit emmené, il s’eſtoit reſolu d’errer de Cour en Cour, & de Province en Province : que pendant un voyage qu’il avoit fait en Grece, il s’eſtoit
