croire : Non non, luy disoit il, il faut que Gelonide ait perdu la raison, ou que la vostre ne soit pas en son assiette ordinaire. Thomiris qui depuis plus d’un an voit avec indifference, la passion d’Indathirse & d’Aripithe, ne sçauroit estre capable d’aimer Artamene. Artamene, dis-je, qui ne l’aime point ; qui n’a rien fait ny rien dit qui le luy deust faire croire ; qui au contraire luy fait parler de mariage pour le Roy qui l’envoye ; & qui ne paroist enfin à ses yeux, que comme un simple Ambassadeur de Ciaxare. Encore une fois Chrisante, vous n’estes pas ce que vous avez accoustumé d’estre : ou Gelonide vous a trompé. Seigneur, luy dit il, il n’est arrivé nul changement en mon esprit, Gelonide ne m’a point trompé ; & Gelonide m’a parlé avec beaucoup de sagesse. Ainsi il faut s’il vous plaist, que vous me donniez vostre response : car elle ne m’a donné que jusques à demain pour la luy rendre. Artamene paroissoit estre si confondu, entendant parler Chrisante de cette sorte, qu’il estoit facile de voir que ce n’estoit pas sans peine, qu’il se resoluoit à croire ce qu’on luy disoit : Neantmoins, r’apellant en sa memoire plusieurs choses qu’il avoit veües ou entendües ; & ausquelles il n’avoit pas pris garde auparavant : il ne douta plus qu’il ny eust de la verité en ce que luy disoit Chrisante. Il eust pourtant bien voulu, s’il eust esté en son pouvoir, que Chrisante & moy ne l’eussions pas sçeuë, & s’il luy eust esté possible de nous la cacher, je ne doute pas qu’il n’y eust aporté tous ses soins : tant il est vray que son ame agit genereusement en toutes choses. Mais comme il ne le pouvoit faire, il tascha du moins de se consoler avec nous, en exagerant son malheur.
Page:Scudéry - Artamène ou le Grand Cyrus, seconde partie, 1654.djvu/222
Cette page n’a pas encore été corrigée
