Page:Scudéry - Artamène ou le Grand Cyrus, seconde partie, 1654.djvu/192

Mais comme il estoit arrivé que quelques Pyrates avoient pris plusieurs Vaisseaux Marchands sur la Met Caspie, qui apertenoient a des Capadociens : & qu’il s’estoit fait une espece de petite guerre maritime, entre ces Capadociens & ces Pyrates, qui estoient du Pars des Massagettes : ce fut cette negociation qui fut le pretexte de ce voyage : quoy qu’en effet il ne fut entrepris, que pour traiter en secret du Mariage de Thomiris avec Ciaxare. Je ne m’arresteray point à vous dire, toutes les carresses que le Roy fit à mon Maistre en s’en separant, ny toutes celles que toute la Cour luy fit ; Aribée mesme parut estre plus de ses amis qu’à l’ordinaire : & Artamene avoit sans doute en aparence tous les sujets du monde d estre satisfait de luy. Mon Maistre avoit pourtant dans le cœur une inquietude secrette qui ne luy donnoit pas peu de peine : car enfin depuis que Philidaspe, ou pour mieux dire le Prince d’Assirie avoit disparu, l’on n’en avoit eu aucunes nouvelles. L’on avoit mesme sçeu, qu’il n’estoit point retourné à Babylone : & que la Reine Nitocris estoit tousjours fort en peine d’une si longue absence. Il y avoit aussi des momens, ou Artamene ne sçavoit pas trop bien s’il devoit croire que Philidaspe fust en effet ce qu’il avoit dit estre : & il y en avoit d’autres aussi, où il n’en doutoit point du tout. Mais enfin son equipage estant prest, il falut partir, & dire adieu à la Princesse jamais, Seigneur, je n’ay esté plus fortement persuadé qu’en cette rencontre, que les Dieux envoyent quelquefois aux hommes, des pressentimens de ce qui leur doit arriver : car mon Maistre eut une si sensible douleur en quittant Mandane ; & cette Princesse, quoy que tres accoustumé à vaincre ses sentimens,