Page:Scudéry - Artamène ou le Grand Cyrus, seconde partie, 1654.djvu/187

Mais voyant enfin qu’encore que Ciaxare luy fist l’honneur de luy demander son advis, c’estoit pourtant une chose resolue : il luy dit à la fin, que pour ce qui estoit de son mariage, ce n’estoit point a luy à se mesler d’en parler, ny de conseiller un Roy si prudent. Que pour ce qui estoit de l’aprendre à la Princesse, il le seroit puis qu’il le luy commandoit : Mais que pour aller vers la Reine des Massagettes, c’estoit une chose où selon son sens il n’estoit pas propre. S’il falloit l’aller conquerir à force d’armes, luy dit il, je pourrois peut-estre me vanter, de le faire aussi tost qu’un autre : Mais comme il ne faut que la persuader, dispensez moy s’il vous plaist, Seigneur, d’un employ où certainement je suis moins propre que vous ne croyez. Ciaxare l’entendant parler ainsi, creut tousjours que sa modestie toute seule, luy faisoit tenir un semblable discours, c’est pourquoy il ne s’y arresta pas : & il luy dit seulement qu’il se preparast à partir, le plustost qu’il luy seroit possible. Mon Maistre ne pouvant encore se resoudre absolument, ne respondit pas precisément à Ciaxare ; & sans refuser ny accepter l’employ qu’on luy vouloit donner, il le quitta & fut chez Mandane ; avec ordre du Roy de mesnager son esprit avec tant d’adresse, qu’elle ne se plaignist pas de luy. Aussi tost que la Princesse vit Artamene, elle remarqua aisément, qu’il luy estoit arrivé quelque chose de nouveau & de fascheux : & bien, luy dit elle en paslissant, Cyrus est il descouvert ? Non Madame, repliqua-t’il, & je puis dire au contraire, qu’il n’est que trop bien caché, puis qu’on luy veut donner une commission où il est si peu propre. La Princesse devenuë plus curieuse par cette responce, le pressa de luy expliquer cét enigme ; ce qu’il fit fort exactement ; en luy