Page:Scudéry - Artamène ou le Grand Cyrus, seconde partie, 1654.djvu/168

d’autre, le Roy de Phrigie y estant compris s’il le vouloit, & tous les prisonniers rendus : & que ces Princes se furent veus au Temple, où ils jurerent d’en observer les Articles, & de vivre tousjours en paix : Le Roy de Pont ne fut point chez la Princesse comme un prisonnier : au contraire il y fut comme un Prince libre : & servy par les Officiers de Ciaxare, comme si ç’eust esté luy mesme. Ce Prince a sans doute fort bonne mine, & il estoit fort superbement habillé : La Princesse qui peut-estre avoit voulu avoir cette indulgence pour Artamene, n’estoit point extraordinairement parée : bien est il vray qu’elle n’en avoit pas besoin : & elle estoit si belle ce jour là, qu’elle effaça tout ce qu’il y avoit de plus beau & de plus magnifique à cette Audience. Le Roy de Pont estant donc arrivé, la salua avec beaucoup de respect : & elle le reçeut avec beaucoup de civilité. Elle voulut luy ceder sa place, mais il ne le voulut pas : & il prit celle qui estoit au dessous de la Princesse : luy disant de fort bonne grace, que ce n’estoit point au prisonnier d’Anamene (dit il en regardant mon Maistre en sous-riant) à occuper la place de la Princesse Mandane. Je pense Seigneur, luy dit elle, que vostre Vainqueur ne pretend pas vous faire changer de rang ny de condition : & qu’il est trop genereux, pour vouloir que le Roy de Pont ne jouisse pas de tous les honneurs que sa naissance luy donne. Pleust aux Dieux Madame, repliqua ce Prince en soupirant, que toutes les personnes de qui j’ay porte des fers, m’eussent traité aussi favorablement qu’Artamene : car si cela estoit, je ne serois pas aux termes où j’en suis : c’est à dire en estat d’estre tousjours Esclave & tousjours malheureux. Je ne m’estonne pas, dit la Princesse,