bien considerer ma propre gloire, il m’est mesme important qu’Artamene ne me puisse pas soupçonner de foiblesse. je luy ay dit assez de choses obligeantes, pour craindre qu’il n’en pense plus que je ne veux : & j’ayme mieux enfin qu’il souffre, & que je souffre moy mesme, que de m’exposer à estre moins estimée de luy. Mais Madame, reprit Martesie, pourrez vous bien luy prononcer cét arrest ? je ne sçay, luy respondit elle, & je n’oserois pas l’assurer : neantmoins je seray tout ce qui me sera possible, pour luy cacher la tendresse que j’ay pour luy. C’estoit de cette sorte que l’illustre Mandane premeditoit le cruel arrest qu’elle devoit prononcer à mon cher Maistre ; mais comme il ne le sçavoit pas, il vivoit entre l’esperance & la crainte.
Cependant le Roy de Pont, quoy qu’admirablement bien traité dans sa prison, ne laissoit pas d’estre tres malheureux : car encore qu’il n’eust fait qu’entre-voir la Princesse à une fenestre en entrant dans Sinope, cette veuë n’avoit pas laissé de renouveller dans son cœur les plus vifs sentimens d’amour, dont il se fust jamais trouvé capable : & le souvenir de tant de fois qu’il l’avoit veuë dans cette mesme Ville, le tourmentoit d’une estrangge sorte. Helas (disoit-il, à ce qu’il a conté depuis) que dois-je esperer de ma Fortune ? moy qui dans le temps que j’estois en cette Cour, & en liberté, n’ay jamais pû obtenir un regard favorable de Mandane. Que puis-je donc pretendre vaincu & chargé de fers comme je suis ? je vous dis, Seigneur, une petite partie de ce que pensoit le Roy de Pont, afin que vous n’ignoriez rien de ce qui se passoit à Sinope : Pour Ciaxare, il vivoit en repos, & jouïssoit paisiblement du fruit des victoires d’Artamene. Aribée de son costé, agissoit avec beaucoup de finesse : & faisoit semblant de ne songer
