Page:Scudéry - Artamène ou le Grand Cyrus, seconde partie, 1654.djvu/114

condamnoit toutes ses pensées ; elle se repentoit de tout ce qu’elle disoit : lors qu’elle loüoit Artamene, elle trouvoit qu’il expliqueroit ses loûanges à son prejuoice : & lors qu’elle se faisoit, & qu’elle respondoit avec froideur ; elle craignoit de le desobliger : & presque malgré son intention, elle reparoit cette froideur, par quelque legere civilité, Toute cette visite se passa de cette sorte : & Mandane conduisit la chose avec tant d’adresse ; qu’Artamene ne pût connoistre ses véritables sentimens : & il se retira avec plus d’amour & plus d’inquietude qu’auparavant. En s’en retournant, il trouva chez luy un Capitaine d’Archers à cheval qui l’y attendoit : & qui luy ayant demandé audience en particulier, luy aprit qu’il y avoit environ trois ou quatre heures qu’il avoit rencontré à vingt stades de Sinope, un homme à cheval, qui estoit assez de sa connoissance, & qui venoit à la Ville comme luy. Que luy ayant demandé où il alloit ? cét homme luy avoit paru interdit, & ne luy avoit pas respondu bien à propos. Qu’en suitte estans venus à parler de diverses choses, ils s’estoient querellez & battus : & qu’il estoit arrivé des gens qui les avoient separez. Mais que pendant ce combat, cét homme avoit laisse tomber des Tablettes qu’il avoit ramassées, apres qu’il avoit esté party : & dans lesquelles il croyoit qu’il pourroit peut-estre y avoir des choses qui meritoient d’estre sçeües de luy, veû la confusion qu’il avoit remarqué dans l’esprit de celuy à qui elles estoient : & que cette pensée luy estant venüe, il avoit creû de son devoir de ne les ouvrir point : & de les luy aposter toutes cachetées. Artamene remercia ce Capitaine : & prenant ces Tablettes, il y trouva à peu prés ces paroles.