Sinope, & à Themiſcire. Touteſfois ſa beauté eſt ſi peu changée, que j’ay grand ſujet de craindre que ſon cœur ne ſoit changé pour moy. Car enfin s’il eſtoit vray qu’elle m’aimaſt un peu, ſeroit-il poſſible qu’elle n’euſt pas un ſensible deſplaisir de sçavoir que je ſuis ſi malheureux ; & ſeroit-il poſſible qu’elle euſt conſervé tant de beauté, avec tant de ſujets d’affliction, ſi elle n’avoit pas quelque conſolation que je ne conprens point ? Alors la jalouſie de Cyrus changeant d’objet, les rares qualitez du Roy de Pont luy donnoient de l’inquietude : puis un moment apres le Roy d’Aſſirie luy revenoit encore en l’imagination. Mais quoy que ſon eſprit changeaſt de ſentimens, ſa douleur demeuroit touſjours confiante : & il ne pouvoit ſe conſoler, qu’au lieu de delivrer Mandane, Mandane l’euſt delivré.
Cyrus paſſa donc tout le reſte de la nuit, en de pareilles agitations : il eſtoit encore bien embarraſſé à comprendre, d’où pouvoit venir que le Roy de Pont n’avoit pas luy meſme conduit ces princeſſes : & d’où pouvoit venir auſſi que les Amis de Menecée & ceux de Timocreon, avoient donné de faux advis, touchant le deſpart de Palmis & de Mandane. Mais il sçeut par le gouverneur du Chaſteau d’Hermes, qui l’avoit apris d’un Capitaine de ſes Amis, que Creſus avoit fait publier que leur départ eſtoit differé, afin d’abuſer ceux avec qui le Prince Artamas pouvoit avoir intelligence : & que ce qui avoit empeſché le Roy de Pont de les eſcorter luy meſme, eſtoit que s’eſtant fait une entre-veüe de Creſus & de luy à cinquante ſtades de Sardis, afin de reſoudre toutes choſes entre eux, auparavant que Mandane partiſt d’Epheſe, il eſtoit arrivé, que pour haſter d’autant plus leur deſpart, Creſus avoit
