Page:Scudéry - Artamène ou le Grand Cyrus, quatrième partie, 1654.djvu/627

lieux, qui ſoûtenoit ſon bras droit : dont le Chirurgien qu’on luy avoit envoyé, avoit viſité & penſé les bleſſures. Il avoit meſme le teint ſi paſſe, à cauſe de la perte du ſang, que comme il avoit les yeux fermez, elle le creut mort. Ha Andramite (s’eſcria-t’elle, faiſant ſigne de la main que l’on fiſt arreſter ſon Chariot) comment oſez vous me regarder, apres que vos gens ont tué le plus illuſtre Prince du Monde ? la Princeſſe Palmis dit cela ſi haut, que ſa voix eſtant arrivée juſques au Prince Artamas qui la reconnut d’abord ; non ſeulement il ouvrit les yeux, mais il ſousleva la teſte : & s’apuyant ſur le bras gauche, il fit meſme effort pour ſe lever tout à fait : cherchant des yeux avec empreſſement, la perſonne de qui il avoit entendu la voix. Si bien que comme le Chariot des princeſſes s’eſtoit effectivement arreſté, & que Palmis en eſtoit ſortie avec precipitation ; il la vit aupres de luy, un inſtant apres qu’il eut oüy ſa voix, & qu’il eut ouvert les yeux. Mais helas, que cette entreveüe fut triſte & touchante ! je vous demande pardon, Madame, (luy dit ce Prince bleſſé ; dés qu’il la vit aſſez prés de luy pour l’entendre) de ne pouvoir vous rendre ce que je vous dois : & d’avoir ſi mal deffendu une vie, qui pouvoit n’eſtre pas inutile à voſtre liberté. Je vous demande pardon moy meſme, luy repliqua-t’elle, d’eſtre cauſe des malheurs qui vous arrivent, & des bleſſures que vous avez preſentement : ce n’eſt pas, adjouſta-t’elle, que je n’aye prié les Dieux de vous conſerver : mais c’eſt ſans doute que ne trouvant pas lieu de me rendre aſſez malheureuſe en ma propre perſonne, ils me veulent punir plus rigoureuſement en la voſtre. Ce que vous me dites, Madame,