Page:Scudéry - Artamène ou le Grand Cyrus, quatrième partie, 1654.djvu/569

deux de ſes gens : & qu’à la fin eſtant demeuré ſeul avec les ſiens dans la ruë, il eſtoit allé à cette maiſon, pour sçavoir s’il n’aprendroit point ce qu’Hermodore y alloit faire, & s’il ne sçauroit rien de Ligdamis. Que n’y ayant trouvé qu’une Femme, il l’avoit contrainte de parler, & de luy dire qu’il eſtoit vray que Ligdamis avoit eſté pris chez elle, mais qu’il venoit d’en ſortir avec deux de ſes Gardes. Cleonice me dit encore que ce Parent de Ligdamis eſtoit allé ſe refugier chez un ennemy d’Hermodore, juſques à ce que l’on sçeuſt ce qui arriveroit de ſes bleſſures. Cependant nous commençaſmes de craindre, puis qu’il n’eſtoit pas mort, que Ligdamis ne ſuit pas en aſſurance chez moy : de ſorte que nous jugeaſmes à propos d’advertir promptement ſon Parent au lieu où il eſtoit, afin de donner ordre qu’il ſortist d’Epheſe dés le ſoir meſme : & en effet la choſe fut reſoluë & executée ainſi. Cleonice ne voulut pas meſme donner la conſolation à ce mal heureux Amant de la voir encore une fois, de peur que la viſite qu’elle m’euſt rendue, n’euſt fait deſcouvrir qu’il eſtoit dans ma maiſon. Car vous sçaurez, Madame, que comme la rage & le deſespoir mirent Hermodore hors de luy meſme, il dit tant de choſes à ceux qui le viſiterent ce matin là, qu’encore qu’il ne les diſt pas preciſément. Comme elles eſtoient, on ne laiſſa pas de dire confuſément par toute la Ville, que Ligdamis avoit eſté deſguisé à Epheſe ; qu’il avoit veu Cleonice chez moy ; qu’Hermodore & luy s’eſtoient batus ; & cent autres choſes inventées, ſur ce premier fondement de verité. Tous ces bruits n’inquieterent pourtant pas d’abord extrémement Cleonice : parce qu’elle ne ſongeoit à autre choſe, qu’à sçavoir ſi Ligdamis ſeroit en lien ſeur.