Page:Scudéry - Artamène ou le Grand Cyrus, quatrième partie, 1654.djvu/553

qu’il gagna par de l’argent, pour ſe ſaisir de la perſonne de Ligdamis ; luy oſter ſon eſpée ; & le garder dans la Chambre où ils le trouveroient : donnant ordre aux gens qu’il employa pour cela, de dire à Ligdamis qu’ils l’arreſtoient par le commandement du gouverneur d’Epheſe. La choſe ayant donc eſté reſoluë ainſi, elle fut exécutée ſans peine : parce que celuy chez qui Ligdamis eſtoit logé ouvrit luy meſme la porte, à ceux qui le devoient arreſter comme un criminel d’eſtat : ſi bien que Ligdamis, qui ne faiſoit que de s’en dormir, ſe trouva eſtre priſonnier en ſe reſveillant, & hors de pouvoir de s’oppoſer à la violence qu’on luy faiſoit. Cependant Hermodore bien aiſe de tenir ſon Rival en ſon pouvoir, attendit avec une impatience extréme, l’heure où il pourroit voir Cleonice : mais comme il n’avoit pas la liberté de la viſiter le matin, il falut qu’il attendiſt juſques apres diſner. Il eſt vray qu’il y fut de ſi bon ne heure, qu’il la trouva ſeule dans ſa Chambre : apres luy avoir fait la reverence, qu’elle luy rendit avec aſſez de froideur ; Madame, luy dit-il, je ſuis bien fâché d’eſtre obligé d’augmenter la me lancolie que je voy ſur voſtre viſage : mais j’ay pourtant creu que je devois vous advertir que Ligdamis eſt arreſté. Ligdamis (reprit Cleonice infiniment eſtonnée) eſt arreſté ! on aura donc ſurpris le Chaſteau d’Hermes (adjouſta-t’elle, ne voulant pas faire paroiſtre qu’elle sçavoit que Ligdamis eſtoit ou avoit eſté à Epheſe : ) nullement, Madame, repliqua-t’il, mais il a luy meſme eſté ſurpris deſguisé dans la Ville par un homme de ma connoiſſance, qui eſperant une grande recompenſe de Creſus, s’il remet entre ſes mains un Criminel d’eſtat qu’il a tant d’envie