Page:Scudéry - Artamène ou le Grand Cyrus, quatrième partie, 1654.djvu/375

Patrie qu’il eſtoit, mais principalement parce qu’Aglatidas eſtoit dans ſon Armée : au lieu de demeurer avec Phraarte, il ſe reſolut de ſe dérober. Et en effet à la faveur de la nuit, il ſe mit derriere quelques roches eſlevées, qui ſont en quelques endroits au bord du Torrent : mais comme les armes qu’il avoit eſtoient fort belles, & par conſequent fort remarquables ; il jugeoit bien qu’il ne luy ſeroit pas aiſé de ſe cacher ny de traverſer le Camp lors qu’il ſeroit jour ſans eſtre arreſté. Apres donc qu’il eut remarqué qu’il n’y avoit plus perſonne dans ce petit Vallon ou Phraarte s’eſtoit retiré, & d’où vous le menaſtes à voſtre Tente : il fut chercher parmy les morts dequoy ſe traveſtir : & quittant les magnifiques armes qu’il avoit, il prit un ſimple habillement de Soldat : & il fut en effet ſi adroit & ſi heureux, qu’il traverſa route noſtre Aimée ſans eſtre arreſté, parce qu’il paroiſſoit eſtre de noſtre Party : car l’habit qu’il avoit pris, eſtoit d’un des Soldats que vous aviez perdus à cette occaſion : de ſorte que cela facilita ſa fuitte ; eſtant cependant contraint d’aller à pied, juſques à la premiere Ville où il tomba malade. Mais Seigneur, pour achever de vous eſclaircir comment Dinocrate & moy avions pû voir les armes d’Otane ſur le corps d’un homme mort, que nous priſmes effectivement pour le ſien au milieu de ce Torrent : il faut sçavoir qu’apres qu’Otane les eût quittées, un Soldat Cilicien allant chercher à deſhabiller quelque mort, les trouva à la clarté de la Lune qui s’eſtoit levée : & tout ravy d’une ſi heureuſe rencontre, il quitta les ſiennes, & mit celles là. Un moment apres, deux autres ſoldats qui eſtoient d’Ecbatane arriverent ; qui voyant la magnificence