Page:Scudéry - Artamène ou le Grand Cyrus, quatrième partie, 1654.djvu/348

autrefois tant ſervy à entretenir la jalouſie d’Otane, & à faire perſecuter Ameſtris. De ſorte qu’en conſideration des offices qu’il luy avoit rendus, & qui luy avoient eſté ſi agreables ; elle s’arreſta, & ſouffrit qu’il luy vinſt faire la reverence. Elle s’informa alors comment il avoit perdu ſon Maiſtre, & pourquoy il avoit tant tardé à revenir : & il luy raconta ſans déguiſement, de quelle ſorte Otane avoit pery, au pied des Montagnes d’Artaxate, où le Roy d’Armenie s’eſtoit retiré. Comment il avoit en fuite veû ſon corps dans un torrent, & comment il avoit eſté englouty dans un abiſme : luy diſant encore qu’il n’avoit pu revenir pluſtost, parce que s’eſtant arreſté à une Ville en chemin, il y eſtoit tombé malade. Qu’apres cela s’eſtant donné à un autre Maiſtre, il s’y eſtoit attaché quelque temps : mais que ne s’y trouvant pas bien, il eſtoit enfin revenu, & n’avoit pas voulu paſſer ſi prés d’un lieu où il sçavoit qu’elle alloit ſouvent, ſans demander du moins ſi elle y ſeroit. Mais, luy dit elle, Dinocrate (car nous avons sçeu depuis toute cette converſation, comme vous le sçaurez tantoſt) dites moy un peu ſi Otane lors qu’il mourut, haïſſoit encore bien Aglatidas : il le haïſſoit de telle ſorte, reſpondit-il, que je crois que cela fut cauſe de ſa mort : car il s’eſtoit ſi bien mis dans la fantaiſie de chercher Aglatidas dans tous les combats où il ſe trouveroit, que je crois qu’il ne s’engagea trop avant parmy les Ennemis, que pour taſcher de le tuër. Pour moy, adjouſta-t’il, comme ce combat fut fait de nuit, je ne puis bien dire comment ce malheur arriva : mais quoy qu’il en ſoit, je l’ay veû mort de mes propres yeux, & beaucoup d’autres l’ont veû auſſi bien que moy : & alors il me nomma. Pendant