Seigneur, cette audience particuliere que Megabiſe avoit eue ſi finement, penſant qu’elle luy deuſt ſervir ; fut ce qui avança la reſolution favorable, qu’Ameſtris devoit prendre pour Aglatidas. Apres cela nous nous retiraſmes : mais quoy qu’Ameſtris euſt pû dire, il eſt pourtant certain qu’Aglatidas fut tres inquiet : & que ce qu’il avoit veu, luy tint tellement en l’eſprit, que de tout le ſoir je ne pus l’obliger à parler d’autre choſe.
Cependant apres que nous fuſmes partis, Menaſte acheva de faire reſoudre Ameſtris à ſe declarer ouvertement à tout le monde pour Aglatidas : sçachant bien que quand cela ſeroit, il n’y auroit perſonne aſſez hardy, en la poſture ou il eſtoit aupres de Ciaxare, pour oſer entreprendre de troubler ton bonheur. Mais comme elle euſt eſté bien aiſe de deſcouvrir ſi la choſe eſtoit comme ſon Portier la luy avoit dite, ou s’il y avoit eu de la fourbe : quand elle fut retournée chez elle, & qu’elle fut dans ſa Chambre ; elle apella une de ſes Femmes qui eſtoit fine & adroite, pour luy donner la commiſſion de s’informer bien preciſément ſi cét homme n’avoit point eu quelque intelligence avec les gens de Megabiſe. Madame, luy reſpondit-elle, je ne sçay pas s’il en a avec ſes gens : mais je sçay bien qu’il y a deux jours qu’en revenant du Temple aſſez matin, je vis Megabiſe à un coin de ruë deſtourné, qui parloit à luy : neantmoins comme je creus qu’il luy demandoit ſeulement ſi vous eſtiez deſja au Temple, ou ſi vous iriez bientoſt, je ne m’arreſtay pas davantage à les regarder : & je paſſay outre ſans qu’ils y priſſent garde. Cette Fille n’eut pas pluſtost dit cela à Ameſtris que ſans tarder plus long temps, elle envoya une ſeconde
