Page:Scudéry - Artamène ou le Grand Cyrus, quatrième partie, 1654.djvu/320

chez Ameſtris, ſans luy parler jamais de rien qui le puſt faire mal-traiter, ny luy donner pretexte de le bannir de chez elle. Et pour colorer la choſe auprés de Tharpis, elle luy diſoit qu’on luy avoit eſcrit en ſecret de l’Armée, qu’auſſi toſt que Ciaxare ſeroit arrivé à Ecbatane, vous rapelleriez Aglatidas : ſi bien qu’elle luy faiſoit voir qu’il luy ſeroit bien plus advantageux d’attendre à ſe declarer pendant ſon abſence : luy diſant en ſuitte que toute l’importance de la choſe, eſtoit d’empeſcher autant qu’on le pourroit, qu’Ameſtris & Aglatidas n’euſſent de longues converſations particulieres enſemble, durant le ſejour qu’il ſeroit à Ecbatane : De ſorte que Tharpis devint ſi aſſidu chez Ameſtris, qu’il eſtoit impoſſible d’y aller ſans l’y voir. Aglatidas voulut à diverſes fois chercher à le quereller, mais Ameſtris le luy deffendit abſolument : car encore qu’il l’importunaſt fort, elle ne vouloit pourtant point qu’on le querellaſt, ſans autre raiſon que celle de ſes fâcheuſes, viſites. Elle n’oſoit pas auſſi luy faire dire qu’elle n’y eſtoit point, & laiſſer entrer d’autre monde : ſi bien que pour avoir le plaiſir de voir Aglatidas, il faloit qu’elle euſt l’incommodité de voir Tharpis. Ce n’eſt pas qu’il ne ſoit aſſez agreable : mais c’eſt qu’il nous contraignoit tellement, Ameſtris, Menaſte, Aglatidas, & moy, que quand il arrivoit qu’il n’y avoit que luy avecques nous ; nous ne sçavions dequoy parler. Tout le monde ſe taiſoit afin qu’il s’ennuyait, mais cela ne ſervoit à rien : car quoy que l’on pûſt dire ou ne dire pas, il eſtoit touſjours là, & ne s’en alloit qu’avecques les autres, & meſme apres les autres. Ainſi ce n’eſtoit plus que quelques fois chez Menaſte, qu’Aglatidas pouvoit parler un