Page:Scudéry - Artamène ou le Grand Cyrus, quatrième partie, 1654.djvu/304

compagnie. Mais comme Ameſtris sçavoit bien que je n’ignorois pas tout ce qui s’eſtoit paſſé entre eux, ma preſence n’euſt rien changé à cette entre-veuë, s’il ne s’y fuſt trouvé que moy. Cependant, Seigneur, elle ſe fit d’une maniere ſi extraordinaire à mon gré ; que l’en fus ſurpris : car au lieu de ces grands teſmoignages de joye, que l’on voit ſur le viſage de ceux qui s’aiment, & qui apres de grands malheurs & une longue abſence, ont le plaiſir de ſe revoir : comme Ameſtris vouloit cacher une partie de ſa ſatisfaction à Aglatidas, elle luy parut d’abord ſi ſerieuse, que toute la ſienne diſparut de ſes yeux : & ſon cœur ſe troubla de telle façon, qu’il ne put qu’à peine luy dire quelques paroles de ſimple civilité. Ce qui l’embarraſſoit le plus, eſtoit qu’en entrant chez elle, nous avions trouvé une Dame qui y venoit comme nous : ſi bien qu’Aglatidas ne sçavoit quel compliment faire à Ameſtris : & Ameſtris non plus ne sçavoit pas trop bien que luy reſpondre. De luy dire qu’il prenoit part à la perte qu’elle avoit faite, elle eſtoit ſi petite qu’il n’y avoit point d’aparence de l’en conſoler, & la choſe euſt ſans doute ſemblé ridicule : de luy dire auſſi, qu’il s’en reſjoüiſſoit, elle s’en ſeroit offencée : de ne luy rien dire du tout, cela euſt eſté hors de bien-ſeance : ainſi Aglatidas ne fut pas en une petite peine ; & je ne sçay pas trop bien comment il ſe tira de ce premier compliment : parce que durant qu’il le fit, je me mis à parler à Menaſte, pour luy dire qu’elle n’avoit pas eſté auſſi adroite qu’elle nous l’avoit promis, puis que cette Dame eſtoit venuë nous importuner. En effet tant qu’elle y fut, la converſation fut eſtrangement contrainte : Aglatidas eſpera toutefois que quand elle ſeroit ſortie, la froideur d’Ameſtris ſe diſſiperoit :