aucun de ſes gens que par Dinocrate : de qui la laſche complaiſance, l’avoit admirablement bien mis dans ſon eſprit. Il n’y fut pas pluſtost, qu’il l’envoya donner ordre que l’on tinſt ſes chevaux preſts à partir à la pointe du jour : & en effet apres avoir paſſe la nuict dans des agitations inconcevables, à ce qu’il a conté depuis, dés que le jour parut il monta à cheval ſans revoir Ameſtris, & s’en alla à la campagne, pour eſviter la rencontre du monde, n’eſtant pas encore bien reſolu de ce qu’il vouloit dire : car pour ce qu’il vouloit faire, cela n’eſtoit pas douteux : & il auroit pluſtost choiſi la mort, que d’accepter ce qu’Aglatidas avoit obtenu pour luy. Cependant l’abſence d’Otane donnant un peu plus de liberté à Ameſtris, parce que tous ſes eſpions ne luy eſtoient pas fidelles, elle vit Menaſte pour ſe conſoler : & elle vit auſſi Artemon, qui luy apprit la cauſe de la fureur de ſon Mary. Mais lors qu’elle fut ſeule avec ſa chere Menaſte, elle luy advoüa que quoy que la colere d’Otane j’affligeaſt extrémement, & qu’elle fuſt au deſespoir d’apprendre la bizarre reſolution qu’il prenoit de refuſer ce Gouvernement que tout le monde sçavoit qu’il avoit tant ſouhaité : neantmoins elle avoit quelque plaiſir à penſer, qu’Aglatidas l’aimoit encore aſſez pour avoir eſté capable à ſa conſideration, de ſervir Otane qu’il avoit touſjours haï. Pour moy, diſoit Menaſte, je ne puis que je n’admire cette diverſité d’evenemens, qu’une meſme paſſion cauſe : car enfin c’eſt parce qu’Aglatidas vous aime, qu’il oblige Otane qu’il n’aime pas : & c’eſt auſſi parce qu’Otane vous aime, qu’il ne peut ſouffrir qu’Aglatidas le ſerve. Ha Menaſte s’écria Ameſtris,
Page:Scudéry - Artamène ou le Grand Cyrus, quatrième partie, 1654.djvu/290
Cette page n’a pas encore été corrigée
![](http://upload.wikimedia.org/wikipedia/commons/thumb/f/f2/Scud%C3%A9ry_-_Artam%C3%A8ne_ou_le_Grand_Cyrus%2C_quatri%C3%A8me_partie%2C_1654.djvu/page290-1024px-Scud%C3%A9ry_-_Artam%C3%A8ne_ou_le_Grand_Cyrus%2C_quatri%C3%A8me_partie%2C_1654.djvu.jpg)