Page:Scudéry - Artamène ou le Grand Cyrus, quatrième partie, 1654.djvu/264

dans une ſi grande contrainte, qu’elle ne pouvoit s’empeſcher de s’en pleindre à ſa chere Menaſte. Anatiſe comme les autres fut auſſi viſiter Ameſtris avec d’autres Dames : & comme il y a touſjours dans le monde des gens indiſcrets, & qui prennent autant de plaiſir à dire des choſes fâcheuſes, que d’autres en ont à en dire d’agreables : il y eut un homme, qui voulant embarraſſer ces deux perſonnes, commença de parler devant elles d’Aglatidas & de ſon abſence : demandant tout haut ſi quelqu’un en sçavoit la cauſe. Ameſtris & Anatiſe rougirent toutes deux ; l’une de colere, & l’autre par modeſtie : & comme la parole de celuy qui avoit parlé ſi mal à propos, s’eſtoit plûtoſt adreſſée à Ameſtris, qu’aux autres, elle répondit qu’il y avoit deſja ſi long temps qu’Aglatidas ne luy faiſoit plus de viſites quand il eſtoit party d’Ecbatane, qu’il n’y avoit pas d’apparence qu’elle pûſt eſtre bien informée de ſes deſſeins : & il y en a beaucoup davantage (dit-elle en ſe tournant malicieuſement vers Anatiſe) que cette belle Perſonne en sçache quelque choſe. Je ne sçay meſme, adjouſta-t’elle, ſi ce n’eſt point ſa cruauté que l’on doit accuſer, de la perte qu’Ecbatane a faite d’un ſi honneſte homme : eſtant à croire qu’elle aura eu tant de rigueur pour luy, qu’il ſe ſera banny luy meſme de deſespoir. Anatiſe irritée de la malicieuſe raillerie d’Ameſtris, luy répondit avec un ton de voix un peu aigre, & qui fit aſſez connoiſtre qu’elle sçavoit bien que ſa cruauté n’eſtoit pas la cauſe de l’abſence d’Aglatidas. Comme elle eſt fiere, & qu’elle n’ignoroit pas que tout le monde sçavoit qu’Aglatidas l’avoit quittée, lors qu’elle ne s’y attendoit point, elle