Page:Scudéry - Artamène ou le Grand Cyrus, quatrième partie, 1654.djvu/212

Timocreon, car il avoit sçeu qu’il eſtoit arrivé : mais à peine Cyrus le vit-il, qu’ayant impatience qu’il fuſt auſſi affligé que luy, voſtre eſperance, luy dit-il, eſt trompée auſſi bien que la mienne : & noſtre Princeſſe eſt plus captive qu’elle n’eſtoit, comme vous le pouvez sçavoir par Timocreon. Le Roy d’Aſſirie s’aprochant alors de luy, ſe fit redire tout ce qu’il avoit dit à Cyrus, qui s’en alla à ſa Tente, ſe pleindre de ſes infortunes, avec un peu plus de liberté. Il ordonna toutes-fois que l’on allaſt au devant de Cleandre l’aſſeurer de ſa part, qu’il trouveroit un Azyle inviolable aupres de luy : & il voulut meſme qu’on le luy amenaſt, afin qu’il le preſentast au Roy ſon Pere. En effet apres qu’il eut employé prés de deux heures à conſiderer l’opiniaſtreté de ſon malheur : & qu’il eut envoyé advertir la Princeſſe Araminte de ce faſcheux ſuccez ; elle qu’il sçavoit bien eſtre en peine de la choſe pour plus d’une raiſon ; on luy vint dire que Cleandre, Menecée, & Tegée eſtoient arrivez. Faiſant donc treſve avec ſa douleur pour un moment ; ou pour mieux dire, en renfermant une partie dans ſon cœur pour carreffer un Prince, de qui la reputation eſtoit ſi grande, il commanda qu’on le fiſt entrer, & s’avança pour le recevoir. Cette premiere entreveüe ſe fit de fort bonne grace de part & d’autre : & comme Cleandre eſtoit affleurement un des hommes du monde le mieux fait, & de la meilleure mine, Cyrus en fut charmé d’abord : & l’on vit ſur le viſage de ces deux Princes, au premier inſtant qu’ils ſe virent, que quoy qu’ils euſſent entendu dire l’un de l’autre, tout ce que l’on peut dire de deux perſonnes fort extraordinaires, ils ne laiſſerent pas d’eſtre ſurpris ; & : ils ſe regarderent avec