Page:Scudéry - Artamène ou le Grand Cyrus, quatrième partie, 1654.djvu/193

matin pour aller au Temple, & que de plus il eſtoit fort bien deſguisé ; elle ſe conſola, & ſe r’aſſura meſme un peu. Il eſt vray que la liberté de Cleandre, reſſerra la priſon de la Princeſſe (s’il eſt permis de nommer ainſi un lieu ſi ſacré que celuy là) car dés que Creſus sçeut que Cleandre eſtoit delivré ; il vint de nouveaux ordres à Ageſistrate, de prendre encore garde de plus prés à la Princeſſe Palmis : Mais comme l’Amie de Menecée eſtoit pour nous, le redoublement des Gardes ne ſervit de rien. Il arriva meſme un cas fortuit fort eſtrange : qui fut que Cleandre retrouva dans la maiſon où il eſtoit logé, tout ce qui pouvoit ſervir : à ſa reconnoiſſance, & voicy comme la choſe eſtoit arrivée. Nous sçeuſmes donc, que ce domeſtique de mon Pere qui eſtoit chargé de toutes ces choſes, & de beaucoup d’autres encore ; voyant ſon Maiſtre priſonnier, s’eſtoit reſolu de dérober tout ce qu’il avoit à luy, & qu’il s’eſtoit allé embarquer à Epheſe. Que connoiſſant un ſerviteur de cette maiſon, il luy avoit laiſſé beaucoup de choſes à garder : & entre les autres, tout ce qui pouvoit ſervir à la reconnoiſſance de Cleandre : luy declarant que s’il mouroit, il luy donnoit tout ce qu’il luy laiſſoit entre les mains : & luy diſant qu’il n’oſeroit revenir que ſon Maiſtre ne fuſt hors de peine : Mais en effet il eſt à croire qu’il penſoit que Creſus feroit mourir mon Pere : & qu’apres il pourroit revenir à Epheſe, & y joüir en repos de ſon larcin. Cependant comme il s’embarqua dans un vaiſſeau de la Ville, & qu’il n’alla qu’à l’Iſle de Chio, ſon Amy avoit ſouvent de ſes nouvelles : mais il aprit enfin qu’il eſtoit mort, lors que Cleandre eſtoit logé chez ſon Maiſtre ; qui eſtoit Amy particulier