Page:Scudéry - Artamène ou le Grand Cyrus, quatrième partie, 1654.djvu/191

le Roy : de plus, Menecée qui avoit conduit l’entrepriſe, avoit cinquante chevaux tous preſts pour nous faire eſcorte : ſi bien que ſans combat & ſans grand tumulte, nous ſortismes de la Citadelle par cette meſme Porte par ou la pauvre Cyleniſe y eſtoit entrée. J’oubliois touteſfois de vous dire, que Tegée ne fut à la Chambre de Cleandre pour le delivrer, qu’apres avoir eſté à celle de Cyleniſe : pour laquelle il y eut un Chariot tout preſt au ſortir de la Citadelle. Cependant comme Menecée a beaucoup d’Amis dans Epheſe ; que de plus c’eſt un lieu, où il eſt plus facile de ſe cacher qu’en tout autre, à cauſe de ce grand abord d’Etrangers, que le fameux Temple de Diane y attire : & qu’outre cela, il eſt auſſi plus aiſé d’y fuir quand on le veut, parce que la Mer y donne : il fut reſolu que ce ſeroit là qu’on ſe retireroit, & d’autant plus que Cleandre ne vouloit point aller ailleurs, à cauſe de la Princeſſe Palmis, & que perſonne ne le voulut abandonner. Joint auſſi que le gouverneur d’Epheſe eſtoit Amy ſi particulier de Menecée, que quand il l’auroit reconnu, il ne craignoit pas qu’il l’euſt voulu perdre, ny ſes Amis non plus que luy. Enfin, Madame, quand nous fuſmes à une journée de Sardis, nous nous déguiſasmes tous le mieux que nous peuſmes : & Cyleniſe avec une Fille qu’on luy avoit donnée pour la ſervir, & qui ne la quitta point, firent auſſi la meſme choſe : de ſorte que nous arrivaſmes à Epheſe comme des Eſtrangers, qui alloient viſiter le Temple de Diane. Menecée fit meſme entrer par diverſes Portes tous ces Cavaliers qui nous avoient eſcortez : reſolu d’avoir touſjours de quoy ſe deffendre, en cas qu’il en fuſt beſoin. La premiere choſe