Seigneur, luy dit il, apres vous avoir apris quelle eſt voſtre qualité, il faut que je vous die encore voſtre premier Nom : & que je vous aprenne que le Roy voſtre Père vous fit donner celuy qu’il portoit en ce temps là : & qu’ainſi il vous faudra un jour changer le fameux Nom de Cleandre, en celuy d’Artamas qui eſt le voſtre.
En ſuite de cela, Cleandre voulut voir Acrate, & entendre de ſa bouche le recit de ſon crime : aſſurant Thimettes, & l’aſſurant luy meſme, qu’il le luy pardonnoit. Cependant comme il y avoit guerre entre le Roy de Phrigie & Creſus, on ne jugea pas à propos de divulguer la choſe : & Cleandre qui avoit des deſſeins ſecrets que Timocreon ne sçavoit pas ; apres l’avoir embraſſé, & luy avoir dit qu’il ne luy devoit pas moins la vie qu’au Roy ſon Pere : apres, dis je, avoir donné cent marques de reconnoiſſance à Thimettes ; il les pria de le laiſſer dans la liberté de s’entretenir : ne voulant pas encore traiter le dernier en Subjet du Roy ſon Pere ; ny ceſſer de regarder Timocreon avecques le meſme reſpect. qu’il avoit toujours eu pour luy. Comme je ne sçavois pas ce qui ſe paſſoit, j’entray dans ſa Chambre, lors que ces trois perſonnes en ſortoient : & comme il m’avoit confié tous ſes ſecrets, & deſcouvert tous ſes malheurs, il voulut auſſi me faire part de ſa bonne fortune, & des inquietudes qu’elle luy donnoit. De ſorte que m’ayant retenu aupres de luy, apres m’avoir raconté en peu de mots tout ce qu’il venoit d’aprendre : comme je voulus me reſjoüir de le voir Fils d’un Grand Roy ; Ha Soſicle, me dit-il, que cette COUronne me ſemble deſja peſante, quoy que je ne la porte pas encore ! Car enfin je voy beaucoup de choſes faſcheuses, parmy celles qui ſont agreables, je trouve
