faut que je paſſe ſur cét endroit legerement : & que je vous die qu’Eſope qui eſtoit encore à Sardis, ayant apris quelque choſe de cette conſpiration, en advertit Cleandre : qui agit avec tant de prudence, que non ſeulement il la découvrit, mais qu’il la détruiſit : & qu’Antaleon fut contraint de s’enfuir, avec intention de ſe refugier chez le Roy de Phrigie. Il n’acheva pourtant pas ſon deſſein, parce qu’en y allant il tomba dans un précipice, & ſe bleſſa de telle ſorte, qu’il mourut quelques jours apres : les Dieux ne voulant pas differer plus long-temps la punition d’un crime ſi noir que le ſien. Mais pour Arteſilas, il fut impoſſible en ce temps là, de rien prouver contre luy : & quoy que nous ayons bien sçeu depuis, qu’il eſtoit de cette conjuration : il demeura dans la Cour, comme s’il euſt eſté innocent. Bien eſt-il vray, qu’il n’oſoit pourtant plus agir ouvertement comme Amant de la Princeſſe : & ſi elle euſt pû écouter ſans colere une declaration d’amour, Cleandre euſt eſté preſque heureux. Car Creſus luy eſtoit tellement obligé, du dernier ſervice qu’il luy venoit de rendre ; qu’il ne croyoit pas que tous ſes Threſors euſſent pû l’en recompenſer dignement. Le Prince Myrſile de ſon coſté, luy devant la vie, croyoit luy devoir toutes choſes : ainſi quoy qu’il connuſt bien qu’il eſtoit amoureux de la Princeſſe ſa Sœur, il ne teſmoigna jamais s’en apercevoir. Cependant Cleandre ne pouvant plus vivre, ſans avoir la liberté de parler ouvertement de ſon amour, à celle qui l’avoit fait naiſtre, menoit une vie tres melancolique : & la Princeſſe ne pouvant plus auſſi s’empeſcher d’eſtimer un peu trop Cleandre, en avoit un chagrin extréme. Car (diſoit elle un jour à Cyleniſe)
Page:Scudéry - Artamène ou le Grand Cyrus, quatrième partie, 1654.djvu/118
Cette page n’a pas encore été corrigée
