accablé d’infortunes, en entrant dans ſa Tente pour ſe repoſer apres tant de glorieux travaux, il luy vint un Courrier de Thraſibule, pour luy aprendre que ſes Armes n’eſtoient pas moins heureuſes entre ſes mains qu’entre les ſiennes : qu’il avoit vaincu tout ce qui luy avoit reſiſté, & que la plus grande partie de la baſſe Aſie eſtoit de l’eſtenduë de ſon Empire. En meſme temps un Envoyé de Ciaxare vint luy dire qu’il eſtoit en eſtat de groſſir encore ſon Armée par de nouvelles Troupes, parce que Thomiris n’eſtoit pas en termes de luy faire la guerre : eſtant tombée dans une maladie languiſſante, que l’on croyoit qui luy feroit perdre la vie ou la raiſon : & pour achever ſon bonheur, un Cavalier qu’il reconnut pour eſtre un de ceux à qui il avoit autrefois pardonné de l’avoir voulu aſſaſſiner par les ordres du laſche Artane, luy preſenta une Lettre de Mandane, qu’il reçeut encore avec plus de joye que la victoire ne luy en avoit donné : & qui luy perſuada meſme devant que de l’avoir leuë, qu’il avoit mal expliqué les Oracles des Dieux, & qu’il alloit eſtre â l’advenir auſſi heureux ſous le nom de Cyrus, qu’il avoit eſté miſerable ſous celuy d’Artamene.
Page:Scudéry - Artamène ou le Grand Cyrus, cinquième partie, 1654.djvu/664
Cette page n’a pas encore été corrigée
