Page:Scudéry - Artamène ou le Grand Cyrus, cinquième partie, 1654.djvu/661

d’aller deffendre Sardis : & le Roy de Pont jugeant auſſi qu’il faloit ſe mettre en eſtat d’aller ſonger à la conſervation de Mandane : ces deux Princes prirent enfin la reſolution de ſe retirer, ce qu’ils firent ſans que Cyrus qui les cherchoit par tout le peuſt empeſcher, ni ſans qu’il sçeuſt meſme par ou ils s’eſtoient retirez, ſi ce n’eſt qu’ils fuſſent dans un gros de Cavalerie, qui fuyant avec precipitation, eſlevoit un ſi grand amas de pouſſiere en l’air, qu’il s’en forma une eſpece de nuage qui les déroba à ſa veuë, & qui l’empeſcha des les pourſuivre. Cependant Cyrus, & Mazare, eſtant chacun à la teſte des Aiſles qu’ils avoient ſi glorieuſment conduittes, ſe joignirent au derriere de la Bataille des Ennemis, qui n’eſtoit plus compoſé que d’un reſte d’Infanterie, toute la Cavalerie ayant fuï. De ſorte que Cyrus ne voyant plus rien qui fuſt en eſtat de luy reſiſter, qu’un Bataillon d’Egiptiens qui faiſoit ferme, commanda à Feraulas de prendre ſes Gardes, dont le Capitaine avoit eſté tué, & de donner dans ce Bataillon. Mais comme Feraulas voulut executer les ordres de ſon Maiſtre, il vit que les Egiptiens ne faiſoient autre choſe que ſe couvrir de leurs Boucliers, & qu’ils agiſſoient comme des gens qui vouloient mourir à la place où il eſtoient. Cyrus ſurpris de voir que ce Bataillon n’avançoit ny ne reculoit, & voyant que par tout ſon Armée eſtoit victorieuſe, & que par tout celle de Creſus eſtoit vaincuë, fit ceſſer le combat, & fit demander à ces Egiptiens pourquoy ils ne jettoient pas leurs armes s’ils ſe vouloient rendre, ou pourquoy ils ne combatoient pas s’ils ne le vouloient point ? Ils reſpondirent à cela que le Prince qui les conduiſoit eſtant mort ; & ſon corps eſtant au milieu de leur Bataillon, ils eſtoient reſolus à ne l’abandonner pas : c’eſt pourquoy ſi Cyrus vouloit qu’ils ſe rendiſſent, il faloit qu’il leur accordaſt la permiſſion