Page:Scudéry - Artamène ou le Grand Cyrus, cinquième partie, 1654.djvu/653

la hauteur qui eſtoit vis à vis de Cyrus, s’ouvrir tout d’un coup à droit & à gauche, pour faire place à la Bataille de Creſus. Cyrus jugeant alors parce qu’il voyoit, qu’enfin les Ennemis eſtoient reſolus à accepter le combat qu’il leur preſentoit, eut une joye inconcevable, de voir que ſa feinte retraitte les avoit trompez, & les avoit malgré eux attirez au Combat, dans l’eſperance qu’ils avoient de le vaincre plus facilement ce jour là qu’un autre, à cauſe du petit deſordre qui eſtoit arrivé. Cependant l’armée de Cyrus eſtoit en eſtat de combatre, & celle de Creſus ne l’eſtoit pas : de ſorte que la diligence de cét illuſtre Conquerant, ſurprit ceux qui le vouloient ſurprendre. En effet ſans perdre temps, & ſans donner loiſir aux Ennemis d’achever de ſe ranger, Cyrus marcha droit à eux : y ayant deſja trois heures & demie que le Soleil eſtoit levé. Juſques alors l’eſperance de la victoire avoit eſté dans l’armée de Creſus : mais dés que les Ennemis virent que Cyrus alloit à eux comme ayant abſolument déterminé de combatre, ils perdirent une partie de leur aſſurance, & tinrent du moins la victoire un peu douteuſe. Le cry de la Bataille que Cyrus avoit donné à ſes Troupes, eſtoit Jupiter Projecteur : mais toute cette Armée, animée parla preſence d’un Prince que tous les Soldats apelloient un ſecond Mars, au lieu de crier Jupiter protecteur, fit retentir l’air du Nom de ce Dieu de la Guerre : de ſorte que rediſant mille & mille fois, Mars, Mars, & ce bruit de tant de voix differentes, ſe meſlant à celuy des Trompettes, des Haubois, & des Clairons, ſembloit deſja eſtre un chant de victoire, quoy que ce ne fuſt qu’au commencement du combat. Ce qu’il y eut de conſiderable, fut que les Tours & ler Machines, ſervirent importamment en cette occaſion, &